<$BlogRSDUrl$>

2004-02-07

Hol ngu'wI' vIchenmoH vIneH 

cha'Hu' pIqaDHom ngu'wI'vam vISam. Daj. <cha'maHlogh yItlhob> rur 'ej cha'maHlogh yItlhob vIQuj 'e' vItIvqu' net Sov.

DaH Hol ngu'wI' vISovchoH vIneH. Hol ngu'bogh De'wI' pat lutu'lu'ba'. wa' 'oghlaw'ta' NITLE. QonoS toghwI' Daq leH 'ej Holmey togh. rur'eghmo' Hol, Hol ghovchoHlaw' machmoH mIw Zip. ngu'wI' puS buv Language Hat jangwI' Pat. Hol Dangu' DaneHchugh ¿Qué? yInID. (tlhIngan Hol ngu'laHbe'). ngu'wI'vam vInIDbe'pu'. cha'vatlh javmaH Hol ngu'laH 'e' maq 'ej law' mI'vetlh 'e' qel. puSlaw'.

Hol ghovnISchugh De'wI', nov Hol mu'tlheghmey ngaSbogh ghItlh woDnIS, HTML buSHa'nIS, 'ej ghItlhHa'wI' cherghnIS.

tlhobbogh Hol ngu'meH boQwI' vImaS. jangDI' Holmey Sovbogh wav. Hujchugh chovnatlh chaq Hol nopHa', vaj chovnatlhDaq Dachchugh vay', Hol naQDaq Dach net qelbe'nIS. jInmolvam vIqellI' ...

2004-02-06

InuktitutvaD pIqaD, De'wI' ghItlhmeH pat je tu'lu' 

pIqaD vIlo'be' net leghba'. blogspotDaq pIqaD jomlu'be'mo' vIlo'be'. tlhIngan pIqaD 'oSbe' Unicode net Hechlaw'. chaq naDev Hol nov vIlo'laH. wej DIch vIghaj. blogspot po'wI'pu' vItlhobta', DaH vIloSlI'. pIqaD vIlo'laHchugh 'ej qo'vaD vI'anglaHchugh, chaq vIlo'.

Hoch Holmey 'oghbe'lu'bogh ma' Unicode net Hech, jatlh languagegeek (Hol valwI' Huj). maj. yIntaHmeH nughmey ngo', cham chu' lumawnIS. De'wI' lo' qellu'DI', ghaytan tlhIngan Hol jatlhwI'pu' ngotlh law' Hoch latlh Hol qub jatlhwI'pu' ngotlh puS. vaj tlhIngan Hol ma'be'mo' Do'Ha', 'a nungnIS nughna' rartaHbogh Holmey.

Hol lo'laHchugh vay' lo'bej 'e' Harlaw' nunavut 'enuqtItut Hol pIn. QuvvetlhDaq Qaliujaaqpait tu'lu. bo logh ghItlhmeH pat rur: De'wI' leQmey motlh lo' 'ej laDlaH Hoch. pIqaD rurbogh pat ghaj je 'enuqtItut. Qaniujaaqpait 'oH pongDaj'e'. Dalegh DaneHchugh, Daqvetlhvo' ghItlhmeH pat yISuq 'ej yIjom. vIghoj vIneH. ghojmeH paqmey vIje'lI'. pawDI' SaDel.

2004-02-05

qonbogh meb jIH 

ben De' vu'wI' jIH. wa'Hu' De' vu' 'e' ghojlI'bogh be'vaD jabbI'ID vIlab. jabbI'IDwIj tIvqu'mo' DaqDajDaq maq. DalaD DaneHchugh vaj Ask Nettie Day yISuch.

chu'be'law' wanI' muchbogh Nettie. qon neH 'ej qechmeyDaj maq neH 'a juppu'DajvaD ghojmoHwI'pu'DajvaD joq maq neHbe'. vaq peghtaHvIS maq 'e' nID. qechvam vIyajchu'. reH luj. Qumchuq qo'. peghchoHlaHbe'lI'mo' qo'maj, potlhqu'choH Holmey qub. rarchuqmo' Hoch nughmey, wa' nuvvaD bIjatlhchugh, HochvaD bIjatlh. bIpegh DaneHchugh, ngoQ Dalo'nIS.

qaStaHvIS tera' veS cha'DIch De' pegh luQum Navajo Hol lujatlhbogh nuv. ngoQ 'oH Holchaj'e'. noH qellu'be'taHvIS, ghoghDaj'e' ghaj vay' 'e' tIv. chaq qo' Hol qub puS toD ngoDvetlh. peghmeH Holmey DIchoqnIS 'e' vImaqbe'. ram meqqoqvam, 'a DIbvetlh je lutIv Heghbe'bogh Hol qub jatlhwI'

2004-02-04

rambe' ram be' 

DaHjaj ram SISbe'law' vaj puv ghojwI'pu'wI' vIneH. 'a murI'be'. jarvam ram SISbe'chugh qub wanI' 'ej 'ummeH ghojwI'pu'wI' wa'maH rep toghnIS. wa'leS chaHvaD jIqu'choH.

2004-02-03

chaq Holmo' jIleng 

chorgh wen qep'a'Daq HaSta much luchenmoHlI' nuvpu' 'ej jInmolchajvaD muyu'. tlhIngan QuchwIj vItuQ, tlhIngan Sut vItuQ 'ej tlhIngan Hol neH vIjatlh. Saghlaw' jInmol.

qep'a'Daq pIj wIyu'lu'. jIHvaD qay'be', 'ej qaSpa' DaHjaj tlhoS wanI' vIlIjpu'. DaHjaj mu'rI' tlhIngan Hol yejHaD pIn. jatlh Cannes DaghoSpu''a'?

jIjatlh ghobe'.

jatlh DaghoS DaneH'a'?

jIjatlh HIja'.

jatlh pagh DaDIlchugh DaghoS DaneH'a'?

jIjatlh HIja' jay'!

chaq HaSta muchvetlhvaD Cannes'e' vIghoS! qechmo' jIQuchqu'. qaSchugh jIQuch. qaSbe'chugh qech vItIvpu'.

2004-02-02

nIDwI' wItu'be'pu'bogh 

pIj tlhIngan Hol tu' vay' 'ej Hol lo'choH. lo'laHchu' vay' 'e' Sovbe'mo', taHbe'. nuvvam yIqel. jar jaj wa'maH Soch yItu'. QonoSDaj Daj tlhIngan Hol mu'mey ghItlhbe' neH. vuD patDaj choH. tlhIngan HolvaD SuchwI'pu'Daj mISmoH 'e' SuD. DaH Dachmo' vuD pat, SuchwI' vuDmey DISovbe'.

taghwI'pu'vam DISamchugh, DIyajmoHlaH 'ej DIpollaH.

2004-02-01

qanaDangan Hol mu'ghom 

DaHjaj pagh vIqon 'e' vIHech 'a bong mu'tay telthvvam vItu' vaj vIqonnIS. Geist Canadian Phrasebook laDnIS Hoch bo logh laDwI'.