<$BlogRSDUrl$>

2004-03-06

'e' vISov 

Dap 'oHbej lutvam'e' -- 'e taghbogh mu'mey'e' vIlo' neH.

'ejyo'waw'Daq 'ech tu'lu'. 'eDjen ghaH; QIv 'elaSnganpu' 'e' Har. wa' jaj, 'evvo' ghoS 'elaSngan 'ejDo'. vaqmeH 'eb jon 'ech. 'evnagh QumwI' woH 'ej 'elaSngan 'ejDo' rI'.

jatlh «Su'eq, 'elaSnganpu', wej pawpu' 'e'mampu'ra'».

loQ mISchoH 'elaSngan QumpIn. be'nI' ghajbe' vavDaj. chaq 'e'mamnalDaj qellI' 'ejyo' 'ech. 'a qatlh 'ejyo'waw' Such 'e'nalpu'Daj?

jang «lISuchbe' 'e'mamma'. qatlh jurI'?»

mISchu'be'mo' 'elaSnganpu' 'e' qeH 'ech. latlh 'eb neH. lab «ghoSuch. tlhIHvaD 'uQ wIghaj»

'eqmo' 'elaSnganpu' 'ej 'eymo' 'ejyo' nay'mey 'e' luSov, 'ejyo'waw' Such 'elaSnganpu' 'e' luwuq.

nom 'ejyo'waw' 'etDaq chol 'ej pay' tlhe' 'ej 'eDSeHcha chu'. 'ejDo' 'emDaq chen 'eng. mev 'ejDo' 'ej pup verghmeH gho vegh. HIchDal vegh 'elaSnganpu' 'ej 'ejyo'waw' lu'el.

'elaSnganpu' nuQmeH chob tInDaq mebpu' Dorbe' 'ech. 'och 'eS 'ang 'ej jatlh «SopmeH pa' yIghoS. 'elpI' vISuqpu'DI' Samuv.» 'och 'elpu'DI' Hoch 'elaSnganpu', cha' 'ermey Suq 'ech. 'och DInDaq 'ermey ba'moH 'ej jatlh «'eH! 'elaSngan loS»

'ochDaq yIt 'elaSnganpu' 'ej namtun bom «yu bIm 'egh!» qa'rI'Daq 'ech ghogh Qoy «. . . loS.» mon 'elaSngan bom taHlaw' 'ech. 'a 'o'megh bompa' 'elaSngan, ghang HIvbogh 'ermey. SIbI' 'etlh yan wa' 'elaSngan 'ej naQ pep latlh. 'etlh jun 'er wa'DIch 'ej naQ 'er'In chopchoH. 'er cha'DIch DuQ 'etlh. pum 'er 'ej 'emchoH. Qep'It 'ep latlh 'er.

«waw'vamDaq leng 'ermey tlhab 'e' Sov'a' 'eDjenvetlh?» tlhup wa' 'elaSngan.

«tamchoH» ja' 'elaSngan HoD. «'a DaHjaj 'ejyo' Soj vIneHbe'law'.»

DaH 'e' boSov.

2004-03-05

Hol nov ghojlaHlaw' boDegh 

monkey Hol yajlaHlaw'bogh boDegh Del Hugo Rainey, Peter Slater, Klaus Zuberbühler je. HIvwI'mey Sar ghaj monkeymey 'ej cholDI' HIvlaHwI', ghum monkey. HIvwI' ngu' ghum. ghummeyvetlh 'Ij hornbill boDegh 'ej boDegh HIvlaHchugh Ha'DIbaH, vaj ghuH boDegh 'ej vang. boDegh HIvbe'laHchugh Ha'DIbaH, jottaH boDegh 'ej buSHa'.

monkeymey ghum yajchoH'a' leopard 'e' vISIv.

wa' waQ De'chaj maq Proceedings of the Royal Society.

2004-03-04

qun qon charghwI' . . . Hol 

'avghanpuH Dan vIran'eSngan Hol jatlhbogh qanaDangan QaS. Kaboul vengDaq mughwI'pu' SamlaHbe' qanaDa mangghom 'e' vISovchoHDI', Hol wanI'mey'e' qaSmoHbogh yot vIqelchoH. roD yot wIqelchugh, HoH, HeS, qum joq DIqel. potlhba' 'ach DaH vIbuSHa'. potlh je Hol.

charghpu'DI' mangghom, SIbI' HoS luSuq charghwI' Hol jatlhwI'pu'. woQ mawlaH; mughwI' gheSchugh Huch bajlaH. charghbogh mangghomvaD roghvaH naQ 'oSmo' charghwI' Hol jatlhlaHbogh Sungpu', chaq vuDmeychaj 'e' luqel DanwI'pu'. qaSpu'DI' yot ngaDHa'ba' puH 'ej qutluch patlhDaj choHlaHchu' valwI'. yotwI' Hol Sovchugh qoj nom ghojchugh vay' puH qun SIghlaH.

Sung Hol SIghba' DanwI' Hol: 'engpuHDaq Norman yot yIqel. SIghchuq Holmey. tlheDpu'DI' DanwI' ratlh Hol. juppu' SIghmo' Holmey Dajalthbogh, qum, boqmey, leng, ngoch SIghtaH. tIgh SIgh, DanwI' ngo' lutmey laDlaHtaH roghvaH. QeD SIgh, tejpu' SIghmo' Qul Hol. tayqeqvaD He wIv Hol.

'a 'avghanpuHDaq mangghom tlhejqangbe' vIran'eS Hol mughlaHwI'. Hevetlh lughoS luneHbe''a'? ghaytan Qut mangpu' neH pagh Qu'mey potlh ghaj neH. mughwI'chaj'e' qemnIS puH'eSngan Hol jatlhbogh mangghom, 'ej taghtaHvIS, latlh Hol lo'qangnIS 'enuqtItut Hol jatlhbogh mangghom. QI' mughwI': Daj Qu'. mughmeH HolvaD bImatlhnIS 'a QI'vaD wo'vaD bImatlhnIS. Hol yajmeH tayqeq yajnIS 'a charghmeH tayqeq buSHa'nIS 'ej nIvlaw' jIvwI'pu'.

wa' latlh Doch muQubmoH lut. qanaDaDaq pIv vIran'eS Hol 'ej Holmaj 'oHtaH QoylaH qo'.

2004-03-03

tlhIngan Hol mung nuD Dick Grune 

HaSta muchvaD tlhIngan Hol 'oghlu'pu' 'ej maQujmeH tlhIngan Hol wIlo' HochHom jatlhwI'pu'. 'a Holna' 'oHmo' SaghtaHvIS vay' Hol HaDlaH. qaStaHvIS DISmey Holmaj HaDta' nuv 'op. DaHjaj wa' vIqel.

tlhIngan Hol qIHDI' vay', pIj ghel «nuq 'oH Hol mung'e'? Doychengan Hol 'oH'a'? 'amer'I'qa' Sung Hol 'oH'a'?» Hol chu' 'oHlaHbej 'e' Harbe'law'. Holmey law' HaDta'mo' Marc Okrand (marq 'oqranD) tlhIngan Hol luSIghba' Hol law' 'a Holmeyvetlh Segh 'oHbe'law' tlhIngan Hol'e'. cha' Holmey DanuDchoHDI' rurchuqbogh mu'mey qechmey je Datu', 'a quqmo' chenchuqmoHbe'. qaSchugh wa'netlh wanI'mey qaSqa' 'op. wa'netlh mu'mey 'oghchugh jatlhwI'pu', latlh jatlhwI'pu' mu'mey rurbej 'op. ghojwI' ghaHtaHvIS marq 'oqranD'e', Sung Hol HaDqu'. Mutsun (mutSen?) 'oH Holvetlh pong'e'. Holvetlh Sovqu'mo' marq, ghaH SIgh 'oH 'e' SIv Dick Grune (DIq ghIrun). chaq SIvqu'be' 'a DuSaq'a'vaD ghItlh qonnISmo' qechvetlh HaD ghIrun. «Ohlonean Hol 'oH'a' Mutsun Hol'e'?: chay' rap Mutsun Hol tlhIngan Hol je?» DalaDlaH. rurqu'be' 'e' wuq ghIrun. Mutsun Hol, latlh 'amer'I'qa' Sung Hol je rurqu'be' tlhIngan Hol mu'tay' pat qoj 'e' maq.

'e' wISov 'ej 'e' jatlh marq 'oqranD, 'a De' tobnIS tej.

2004-03-02

cha' qoS nobmey 

wa' Hogh ret murI' be'. jIHvo' loDnalDajvaD nob je' neH. tugh qaSmo' qoSDaj, qaStaHvIS wa' rep, veng DungDaq muD DujDaq vIHIj neH. loDnalDaj mer neH. qay'be'. qubbe' ghu'vam 'ej ghajvaD De' vIQIj. qaSpu'DI' loS jaj, jeywIjDaq «qoSvaD loD mer be'nal» ghItlhlu' 'e' vIlaD. maj. loDnal be'nal je vIqIH 'ej mapuv jIH loDnal je. qaStaHvIS wa' rep, He Delta'bogh be'nal wIghoS. 'or loDnal. leng tIvqu' 'ej ghaytan chegh. motlhlaw' ghu'. 'a qaS wa' wanI' Huj. qaStaHvIS wa' rep mapuvmo', loQ Huch HevwI'ma' vImerlaw'. ngugh vIbuSbe'.

'a DaHjaj murI'qa' be'. jatlh «choqaw'a'? loDnalwI'vaD nob vIje' vIneH. jIwuq, wa' wen leng vIje' vIneHbej.» jImISchoH 'a jI'IjlI' 'ej vIyajchoH. be' De' vIqonta'DI' ghaHvaD jIchID.

«wejHu' yaHwIjDaq paw be' loDnal je. ghaHvaD «quchjaj qoSlIj!» jIjatlh 'ej morghbe'. He DaDelta'bogh wIghoS 'a DaH latlh be'nal loDnal chaH 'e' vItlhoj!»

be'nal wa'DIch vIrI'qa'. «chaq bong leng DaneHbe'bogh qaDIlmoH» jIjatlh. lut tlhaQ vI'ang. Do' leng nI' tIvqu'pu' loDnalDaj 'ej yap Hoch.

jIDo'. wa'logh, muD DujDaq raQpo'pu' vItoghHa' 'ej ghoch mujDaq wa' loD vIHIj. 'a HoqDaj tIvqu' loDvetlh 'ej QaghwIj vItlhojDI' vIQorghmo' mutlho'. jIDo'taH.

2004-03-01

tlhIngan Hol jatlhwI'pu' SamnISbe'bej Oregon ropyaH 

tlhIngan Hol DanejmeH Google Dalo'chugh, wa' lut Qat law' Hoch tlhIngan Hol lutmey Qat puS. potlhbe' Hol Dalo'bogh. Hoch puHmeyDaq noy lut. QonoSvam DalaDlaHchugh, ghaytan qaStaHvIS wa' Hogh vaghmaHlogh lutvam nIngeH je qorDu'lIj juppu'lI' je.

Daghov'a'? «MultnomahDaq OregonDaq tlhIngan Hol mughwI' poQ ropyaH» net jatlh. «pa', maw'choHpu'mo' SIDpu' tlhIngan Hol neH lujatlhqang». naDev lut lut tu'lu'.

laDDI' HochHom, «tlhIngan Hol??» jatlh, 'a Harchu'be'. «tlhIngan Hol neH jatlhlaHbe' vay'» 'e' luHar.

vIlaDDI' jIH, «Oregon??» jIjatlh, 'a vIHarchu'be'. «maw'choHpu'chugh jupwI', vISov, 'ej qatlh OregonDaq chaHtaH?» Hoch tlhIngan Hol jatlhbogh jupwI' vIqelchoH 'a pIv Hoch 'ej Oregon Dabbe'bej. ropyaH vIrI' 'ej vIt vIghoj. lutvam qel 'e' noplaHbe' bo logh 'a lut'e' vIbuSbe'.

noyqu'mo' lut, nugh ngoD vIQul vIneHDI' nIStaH lutvetlh. qaSpa' wanI'qoqvetlh tlhInganpu' tlhIngan Hol vIchav vIneHchugh vaj mu' Hol vIlo'. 'a DaH reH Oregon Sam.

mu' tlhIngan vImugh 'e' vIghojmeH lutvetlh vIlo'. Holmey vIngu' 'ej vItogh.

'Italya'ngan Hol: loQ tlhIngan Hol Qullaw' qonwI'.
Srebya'ngan Hol: Hol - klingončina; po klingonsky jatlh vay'
vIran'eSngan Hol: APvo' lut nap neH mughlaw'.
norSIqngan Hol: DaqvetlhDaq ru'law' lut 'a 'IHmo' Hol vIrar.
'eSper'anto' Hol: tlhIngan Hol Qat poS 'eSper'anto' Hol Qat nIH 'e' SIv lutvam.
puH'eSngan Hol: AP lut DajmoHbe' nuvvam.
'InDon'eSya'ngan Hol: Hol'e' vIngu'laHchu'be' 'a 'InDon'eSya'Daq jatlhlu'law'.
roSI'ya'ngan Hol: Клингонец ghaH wor'Iv'e'.
Doychengan Hol: vIlaDlaHchu'be' 'ach raplaw' 'ej mu' klingonischen vItIv.
portughalngan Hol: tIqbe' chaq nIvwI' vISamlaH.
polngan Hol: pol HolvaD klingoński jatlhlu' 'e' Daloy'laHba'.
Denmarngan Hol: lut luqel ngotlhwI'pu'.

nIppon Hol vIlaDlaHbe'mo' tetlhwIjDaq Dach.

jImaw'choHchugh Oregon vIghoSnISlaw'.

2004-02-29

Qaplaw'lI' DupwIj 

wej'Hu' Qu' mulab 'angghal. malja' Qu' vImughnIS. DaH vImughta'; nom vImugh. mu'mey Qatlh ngaS 'a nom vIjun 'ej Qapbogh mu'mey vISam. povbe' mu'tlheghmeywIj 'a yap. jajvetlh vIlI'. rInpu'DI' Qu' jIyon. Hoch jaj tlhIngan Hol vIlo'mo' ngeDchoHlaw'pu' Qu'vetlh.

chaq Hoch jaj tlhIngan Hol SaHbogh pagh vIlIngmo', Dubbe'lI' HolwIj: chaq DaH muyonmoH Qu' QIv. jISovbe'. chaq tuSovmoH.