bo logh

mu' tam vIlo'DI' pIj <<tam nuq>> 'e' vISIv. yIqel: roD yopwaH vItuQ 'ach DaHjaj lammo' paH vItuQ. chay' vIDel?

yopwaHvaD paH vItam vImaS
DuH paH yopwaH je vItam
DuH je yopwaH vItam vaj paH vItuQ

DIvI' HolvaD je DIch vIghajbe'. wejHu' Qe'Daq maH jIH loDnalwI' jupma' je 'ej HIDjolev vIlaDtaHvIS jImISchoH.

All dishes may substitute vegetables and rice or garlic mash potatoes for spaghetti with meat sauce.

HIDjolevvetlhvaD spaghetti ngaS pagh nay'. SaH potato naH je neH.

tamlaHlaw' nay'mey. tam SopwI' 'e' vIHar, 'a mu'tlhegh lulajqang loDnalwI' jupma' je.

Quj pIm 'oH : ngoQ tu'lu'be'law'. SIqbogh leQ tIlo'.

yav 'engmey chal log je SuchlaH loD. Hol qelbe'. 'a naDev pov muD Dotlh 'ej ngaj pem vaj qaStaHvIS wa' jaj wa'maH laS rep jIvumtaH.

muD Duj chIjpa' 'orwI' HevaD yotlhmeyvaD je Hoch De' SovnIS. paqDaq De' tu'lu' 'ach pIj choHlaHmo', NOTAM laDnISlu'. choH tetlh bIH NOTAM'e'. DaSuqmeH ghogh HablI' Dalo'laH. qanaDavaD naDev NOTAM lutu'lu' je. CBQ2 DawIvchugh jang De'wI':

THE ONLY NOTAM FOR THIS AERODROME ARE IN CYVR NOTAM FILE BELOW.

DIvI' HolvaD, motlh law'chugh vay' vaj DIpDaq -s chelnISlu'. law' bIH 'e' 'ang mu' ARE vaj qatlh -s Hutlh? NOtice To AirMen 'oSmo' NOTAM vaj law'DI', NOtices To AirMen moj 'ej choHbe' mu' tIqHa'.

jatlhtaHvIS 'orwI' NOTAMs jatlhlu' 'a pabqu' neHlaw'mo' NavCanada -s chelQo'. vIlaDDI' Hujlaw'.

wa'Hu' CBQ2 maSaqtaHvIS pay' QIbDaq tI pe'lI'bogh loD vItu'. SaqmeH yotlhDaq ghaH 'a QIb chenmoHmo' yotlh retlh Sormey, vIleghbe'. wIpaw'laH. jIjotHa' jIH 'ej QeH loD 'e' vIpIH 'a wISujbe'law'. jIv ghaH pagh yoH.

Dalmo' Qe'Homvam HIDjolev not pa' maSop 'a pong vIparHa'bej. Doqmo' bebHom tlhaQ je. (lurgh 'oH SuD'e', tIng chan je jojDaq tu'lu'.)

'eybej crepemey. crepe chenmoHlu'meH tIr Soj beQqu'Daq Soj lanlu'. Soj lanlu'pu'DI' qatlaH SopwI' pagh beQtaHvIS SoplaH. Soj Sar lo'laH vay'. yuch naH je lo'lu'DI' maS Sarah. meghwIjvaD goat nIm let basil je lo'lu' 'ej 'eyqu'.

vIran'eSDaq pIj basil Soplu' 'ej vIparHa'bej. wa' po lupwI' vIloStaHviS mujuS basil HIjbogh Du' Duj. He'qu' 'ej vIlarghDI' jIghungqu'choH.

wa'logh crepe DIneH Sarah Carrie jIH je 'a vumbe' crepe ngevwI'. crepe Qe' retlhDaq latlh Qe' tu'lu' 'ej pa' qev nuv law' Qatlaw' 'a maloSnISlaw'mo' mayev. pay' ghoS jabwI' 'ej nujatlh <Daq latlh pa' tu'lu'>. pa'vetlh 'IHDaq mamob. lojmIt tu'lu' je. lojmIt wIveghDI' meH rurbogh pa' machDaq maqamlaH. pa' veng wIbejlaH. pa' yuch tuj (nIm je) vItlhutlh. vIran'eSDaq Qat yuch tuj 'ej 'eybej. HIDjolevDaq nagh beQmey tu'lu'. bruschetta vIwIv 'ej pawDI' Sojna' 'IH law' nagh beQ 'IH puS. Sarah Carrie Soj vIqawbe' 'a maQuch. jIQuchqu'mo' be'pu' nay'mey vIDIl, vaj Quch Hoch.

Dung mu'mey Daghovbe'chugh vaj tlhIHvaD mu'ghom Daj vIlIH. Rat Hol mu'ghom chu' ngevlu'law'. ngoD lI' tItlhoj:

• paq yIvlu' 'e' tungmeH 'eyHa' nav
• mu'tlhegh much
• mu' mung much
• wabmey muchmeH CD ROM tu'lu'

wej nov Hol ghojrupchugh vay', chaq latlh mut Hol ghojqang.

CannesDaq pagh rat vIlegh, 'a chaq 'angghal mebpa'Daq tu'lu'.

Holvam muSovmoH Language Hat.

Sojmo' noy vIran'eS. CannesDaq maHtaHvIS nay'mey 'ey law' vItIv.

Daqmey Sar wISop. rut vay' juHDaq maSop, rut Qe'Daq maSop, rut Soj wIje' 'ej nay' DIvut. rut Do Qe'vo' Soj wInge'.

Pascale juH wIDab Young, Art jIH je. 'ej nIQ nunob ghaH. muHaghmoH tIr SojqoqDaj: pain americain je'ta'. Wonder Bread rur. maHvaD neH je'pu' 'e' vISovbe'. vImawbe'meH vIghelbe'. Dun Sung tIr Soj 'ej pIj nIQvaD croissant baguette ghap vIje'. chaq painqoq vetlh parHa' Pascale. not vISov.

wa' ram 'uQDaq maSop jIH 'angghal Qanqor, Sarah, Carrie je. novpu'vaD 'oHba' Qe''e'. La CroisetteDaq tu'lu', Chez Freddie ponglu', 'ej DIvI' Hol HIDjolev ghaj. loQ tlhaQ HIDjolev "ghost liver" ngevlu'law'. 'angghalvaD <<HoSDo' chej DaSop DaneH'a'?>> roD HIDjolev vImugh neHlu' 'a Qatlh Qu'. pIj jIjatlh «HIDjolev mu' 'oH!» Qe' HIDjolev yIQIj SoH. <vut> 'oSmeH SaD mu' lutu'lu'.

Dajmo' 'angghal nay' vIqon, 'a Do'Ha' parqu' 'angghal.
'angghal poSDaq HIvje' Dalegh. 'angghalvaD potlhqu' mu'mey Coca Lite (Diet Coke) 'ach Do'Ha' pIj bIrqu'be'. vaj latlh mu' potlh ghoj: glace (chuch).

'angghal risotto vIwaHbe'. Qe'vetlhDaq escargot vISop. qanaDaDaq vISop je. potlhbe' escargot HaDIbaH'e' -- garlic, tlhagh je SopmeH Soplu'. ghaytan escargot 'ey law' mep 'ey' rap, yapchugh garlic. vItIv. pa' canard vISop je 'e' vIHar. Ha'DIbaH vIqawbe'qu' 'a 'uSu' vIqawbej. 'uSu' vut 'e' Sovqu' vIran'eSngan. ghotI' chatlh 'ep Sarah 'ej 'eyqu'. SoplaHchu'be' vaj waH Hoch.

pa' QItqu' jabwI' 'a vIran'eSDaq motlhlaw'. munuQbe' 'a 'op nuQ.

CannesDaq nuv noy law' tu'lu' 'ej jIjaHpa' jatlh Hoch «noywI' Daghombej!» chaHvaD noywI' vInej 'a Do'Ha' nuvpu' vIghovbe'. noywI' nejqu' Steve bang 'ej Cameron Diaz, Angelina Jolie je ngu'. chaH vISaHbe' 'a wa' noywI' vIghom 'e' vItIv.

SONEW lopno' vIghoSmeH autobus vIlIgh. pa' DIvI' Hol jatlhbogh nuv vIQoy, ghogh HablI'vaD jatlhlI'. jatlh 'e' mevDI' jIjatlh «HIqon: limowIj tIn law' Hoch latlhpu' limo tIn puS 'e' vItoblaH vIneH.»jatlh «much DaghoSlI'bogh yIngu'»

jIjatlh «lopno' vIghoSlI'. Do'Ha' much Qat vIghoSlaHbe'. bejmeH chaw'mey vIHutlh»

jatlh «cha'maH wa' ben Cannes vIghoSDI', not naDev jIHpu'. ngugh wIvlu'pu'mo' muchwIj, jIpaw'DI' limo vIlIgh, juH Dun vIDab, 'ej muquvmoH Hoch. tev le' Hev muchwIj. jaS Cannes luSov latlhpu' ngugh 'e' vISovbe'»

much ngo' vIghov 'e' vIpIHbe' 'a jIDochHa'meH jIghel «nuq 'oH muchlIj pong'e'?»

«Monty Python's The Meaning of Life» jatlh.

nuqjatlh?! «muchvetlh vIghaj jIH!» jIjatlh. jIyay'.

Steve Abbott 'oH pongDaj'e'. qaStaHvIS wa'maH Soch DIS Pythonpu' vu'taH. jInmol le'vaD jIjtaH.

muvup 'ej jIHvaD much bejmeH chaw' Suq 'e' nID 'a Degh qar vIghajbe' luj.

reH Monty Python vIbejDI' ghaH vIqaw.